NEWS PRAHAR ( पुणे ) : कात्रज भागातील आंबिल ओढा परिसरात मासे पकडताना वाहून गेलेल्या २६ वर्षीय तरुणाचा मृतदेह शनिवारी सकाळी मुठा नदीपात्रात डेंगळे पुलाजवळ आढळून आला आहे. या युवकाचा अग्निशामक विभागाच्या कर्मचाऱ्यांकडून दोन दिवसांपासून शोध सुरू होता.
अक्षय संदेश साळुंखे (वय २६, रा. शिवमुद्रा चाळ, अप्पर) असे मृत तरुणाचे नाव आहे. अक्षय हा बुधवारी संध्याकाळी मासे पकडण्यासाठी आंबिल ओढ्यात गेला होता. ओढ्यात पाण्याचा प्रवाह जास्त असल्यामुळे तो वाहून गेला.
घटनेचे गांभीर्य ओळखून गंगाधाम आणि कात्रज अग्निशमन वाहन लेकटाऊन, जनता अग्निशमन वाहन शंकर महाराज मठाजवळ, स्वामी विवेकानंद पुतळा आणि कसबा येथील वाहनाने मनपाजवळील नदीपात्र येथे रश्शी, गळ, लाइफ जॅकेट, लाइफ रिंग याचा वापर करत युद्धपातळीवर शोधकार्य करण्यात आते.
भारती विद्यापीठ पोलिस कात्रज, गंगाधाम, जनता वसाहत आणि कसबा अग्निशामक दलाच्या जवानांकडून अक्षयचा दोन दिवसांपासून शोध सुरु होता. अग्निशमन दलाच्या जवानांनी जवळपास दहा ते बारा चेंबरमध्ये अक्षयचा शोध घेतला.
रात्री देखील जवानांचे शोधकार्य सुरु होते. अखेर डेंगळे पुलाजवळ कुंभार वाडा आणि संगम पुलाच्या येथे अक्षयचा मृतदेह आढळून आला. हा मृतदेह जीवरक्षक राजेश काची यांनी संजय जाधव, विकास काकडे यांच्या मदतीने पाण्याबाहेर काढला.
मृतदेह पुढील तपासणीसाठी पोलिसांच्या ताब्यात देण्यात आला. अग्निशमन अधिकारी सुनील नाईकनवरे, प्रदीप खेडेकर, सुभाष जाधव, तांडेल भरत भारती, भरत वाडकर, फायरमन तेजस मांडवकर, अनिकेत पवार, अविनाश जाधव, प्रतीक शिर्के, रोहित जाधव आणि इतर पंधरा ते वीस जणांनी हे शोधकार्य केले.