NEWS PRAHAR ( पुणे ) : नऱ्हे परिसरात असलेल्या खाडेवाडीमधील एका गोडाऊनवर छापा टाकून पुणे पोलिसांच्या गुन्हे शाखेने तब्बल एक कोटी ३९ लाखांचा गुटखा जप्त केला. पोलिसांनी चौघांना अटक केली असून एकाचा शोध घेण्यात येत आहे.
पुष्पेंद्र अकबाल सिंग (वय २७), सुनील पथ्थन सिंग (वय ४५, दोघेही रा. नऱ्हे, मूळ. रा. उत्तरप्रदेश), मुकेश कालुराम गेहलोत (वय २८, रा. आंबेगाव, मूळ. रा. राजस्थान) आणि चंदन अजयपाल सिंग (वय ३२, रा. नऱ्हे, मूळ. रा. उत्तर प्रदेश) अशी अटक करण्यात आलेल्यांची नावे आहेत. तर, आरोपींचा साथीदार नीलेश ललवानी (वय ४०, रा, नऱ्हे) याच्यावर गुन्हा दाखल केला असून पोलिसांकडून त्याचा शोध घेण्यात येत आहे. याबाबत ४२ वर्षीय पोलिस अंमलदाराने सिंहगड रस्ता पोलिस ठाण्यात फिर्याद दिली आहे.
जप्त करण्यात आलेल्या साहित्यात काही कच्चा माल देखील आहे. त्यामुळे आरोपी येथे गुटखा तयार करत असल्याचा संशय आहे. याप्रकरणी येथून पोलिसांना धागेदोरे मिळाले असून याची व्याप्ती आणखी वाढण्याची शक्यता आहे. राज्यात गुटख्याचे पदार्थ विक्री करण्यास बंदी घालण्यात आली आहे. मात्र, तरीदेखील छुप्या पद्धतीने सर्रास गुटखा विक्री केली जाते. पुणे शहरात देखील गुटखा विक्रेत्यांचे मोठे जाळे असल्याचे पोलिसांनी यापूर्वी वेळोवेळी केलेल्या कारवाईतून स्पष्ट झाले आहे. मात्र, पोलिस आयुक्त अमितेश कुमार यांनी अशा अवैध धंद्यावर कारवाई करण्याच्या सूचना केल्या होत्या. त्यानुसार गुन्हे शाखेकडून शहर परिसरात गस्त वाढविण्यात आली आहे.
दरम्यान, शनिवारी (ता. १५) रात्री नऱ्हे भागातील खाडेवाडी येथे एका गोडाऊनमध्ये गुटख्याचा साठा असून येथून शहर परिसरात गुटखा वितरित होत असल्याची माहिती गुन्हे शाखेच्या पथकाला मिळाली. त्यानुसार युनिट दोन, सामाजिक सुरक्षा विभागासह इतर पथकांनी या गोडाऊनवर छापा टाकला. त्यावेळी येथे गुटख्याचा मोठा साठा आढळून आला.
तब्बल २२७ पोत्यांत होता गुटखा…
पोलिसांनी येथून आरएमडी गुटख्याची २०७ पोती आणि चौकीदार गुटख्याची २० अशी २२७ पोती जप्त केली. त्यांची एकूण किंमत एक कोटी ३९ लाख रुपये आहे. पोलिस आयुक्त अमितेश कुमार, गुन्हे शाखेचे अप्पर पोलिस आयुक्त शैलेश बलकवडे, पोलिस उपायुक्त अमोल झेंडे यांच्या मार्गदर्शनाखाली पथकाने ही कारवाई केली.