पुणे : घरोघरी खाद्य पदार्थांची डिलिव्हरी देण्यासाठी कोणत्याही वेळी, कधीही आणि कोठेही जावे लागते. या डिलिव्हरी बॉयना आता गुंडांची भिती निर्माण झाली असून डिलिव्हरी बॉयला लुटण्याचे प्रकार दिवसेंदिवस वाढू लागले आहेत. रामटेकडी येथील उर्दु शाळेमागे एका डिलिव्हरी बॉयला याचा अनुभव आला.
याबाबत निलेश पंडित गायकवाड (वय ३१, रा. मांजरी) यांनी वानवडी पोलिस ठाण्यात फिर्याद (गु. रजि. नं. ९७/२४) दिली आहे. त्यानुसार पोलिसांनी करण, विशल्या, मुज्जा, शुभ्या अशा चौघांवर गुन्हा दाखल केला आहे. हा प्रकार रामटेकडी येथील डॉ़ डब्ल्यु आर खान उर्दु शाळेच्या मागील गल्लीत २६ जानेवारी रोजी रात्री ९ वाजता घडला.
पोलिसांनी दिलेल्या माहितीनुसार, फिर्यादी हे झोमेटो कंपनीचे डिलिव्हरी बॉय म्हणून काम करत आहे. ग्राहकाची ऑर्डर देण्यासाठी ते दुचाकीवर गेले होते. डिलिव्हरी जेथे द्यायची, त्या ठिकाणी बोळीत अंधारातून ते जात होते.
त्यावेळी अचानक चौघा जणांनी त्यांना अडवले. कोयत्याचा धाक दाखवून शिवीगाळ करत दमदाटी करु लागले. फिर्यादीच्या सॅक तपासून त्यातील हार्ड डिस्क, चेक बुक व २ हजार रुपये रोख असा ५ हजार रुपयांचा माल जबरदस्तीने हिसकावून घेऊन पळून गेले. सहायक पोलीस निरीक्षक देशमुख तपास करीत आहेत.